سولفت للشوق يارفحا ذبحني ضماك
وانا ادري الشوق كافر والمفارق عنا
ياقحويان القصيد اللي يذوب بمساك
مافيه غير المشاعر .. والقصايد وانا
اشتقت لك لين بينت الخضوع لرضاك
وسامرت للذكريات انفاس ليل وسنا
واشتقت يوم الطفوله ترتمي في حماك
وحدودنا فندق ... فيك العلاوي بنا
مابين عطر التراب وبين عالي سماك
ومابين بطن السحاب اللي حصاده جنا
مالوم نبت الطبيعه لا انحنى من غلاك
وعبر عن اللي .. تبنته الليالي بنا ،!
ناديتي الغيث وهلل من مكانه وجاك
والارض تسجد شكر والغيم منك دنا
ماشوف بك عيب يخفي في عيوني حلاك
اشوفك الام والصدر ... المشرع لنا
لاشلتي الشال عن وجه بياض وملاك
عودتي .. الطفله اللي ماسواها فنا
يابنت شوفك بعيد ولا وصلنا مداك
واهلك ماهم بحاجة مدح طيب وثنا
افعالهم ضي يسطع بالسما من ضياك
ابعد من سهيل عن درب الردى والخنا
حتى الصغير ان ربا بارضك وحس بعطاك
كريم وان فاتته فعل ... المكارم طنا
بالمختصر شاعرك هام وتنفس هواك
لين انطبع كل شارع في عروقه هنا ،!
