حلمٍ حلمته ياعسى شوفته خير
لوكان بين من مواريه شِينه
اقطع من كتوفي لحم واعلف الطير
والطير شايلي بقلبه ضغينه
عن المرابح قمت احسب المخاسير
باول هداده خمني في يدينه
للكذب في وجهه رسوم وتعابير
حرام ماتامن يساره يمينه
بالله يا اهل العلم واهل التفاسير
كلش ولا سبع العجاف السمينه
جتني هموم وصادفتها تفاكير
من حرها باقصى الحشا مستكينه
ماجتني الضيقه على حزة عصير
لا والله الا الضيق جاني بحينه
من شفت طلقين الوجيه المسافير
على الردى يتلون بياع دينه
ياصاحبي ماهي بقيت معاذير
صديت بس القلب رده حنينه
بترت شلة عاشقين المشاهير
بتر القدم لا صابها غرغرينه
اللي رمى في وسط دربي مسامير
الله حسيب الناس بيني وبينه
من عاده اللي مايشاور ولا يشير
ربك عليم منينهم جايبينه
حطوه مابين السلف والمظاهير
وارهو عليه من الحكي مشترينه
عمر الحميا ما تجي بالدنانير
تجي بنبض القلب ياعارفينه
مالي ومال اهل الوجيه المخامير
بترك هزيل الهرج يامقتفينه
تنبت على درب الموادع نواوير
مع ان لحظات الموادع حزينه
اجمل وداع اللي يهز الجماهير
واقسى كلام اللي يجيب الغبينه
