البارحه بين الحروف المطافيح
‏ارقى ظهر غيمه واحول لغيمه

‏تجيني افكار الشياطين وازيح
‏وامشى على نهج القلوب السليمه

‏قل للوجيه اللي ملا صدورها القيح
‏لو انها ماهي كفو للحشيمه

‏جنبت عن سود المزون المراويح
‏واخترت لي من غيمة الحرف ديمه

‏السالفه ماهي ظهورٍ مدابيح
‏السالفه مابين مبدا وشيمه

‏اقدر اولع في سماهم مصابيح
‏بس الفتن مامن وراها غنيمه

‏طبعي اليا راودني الذنب تسبيح
‏واصد عن بعض الحروف العقيمه

‏لاجابت الزله حلوق المشافيح
‏واستنكرت بعض النفوس العظيمه

‏اشيح بعض احيان واحيان مااشيح
‏واحاول اصنع للعزيمه عزيمه

‏اخاف لا دنقت من قوة الريح
‏كبرت معاهم واحسبوها هزيمه