سلام يا جلسه على جال رق راق

يجري بها الوادي من الغيث سالي

تصوير خالد للطبيعه لنا راق

في وسط بريّه نظرنا الجمالي

كشته على موتر كما نوض براق

صمم على ظهره مكا ن الدلالي

محمد عبدالله الشهري- جبل اثرب

جانا الربيع وصاحبتنا السلامه

ويّا الرفاق وساقنا للغلا شوق

ما احلى الطبيعة وجلسةٍ في كرامه

بين الصحب واشعارهم تبرق بروق

جلسة محبهّ ما عليها غمامه

من فوقنا شمسٍ لها ننطر شروق

كل من يقول ابيات حبّ وشهامه

نتجاذب الاشعار من كل طاروق

ينابيع السبيعي

يا زين شوف الجو في وقت الأمطار

في جو خالي ما سكن في اراضيه

منظر خيال ومن على مد الأبصار

ولاشافه الشوّاف ينسى بماضيه

والجيب واضح مجهزينه للأسفار

راعيه يفطن له ويتعب يحاضيه

ودايم مشاويره مع الناس الأخيار

ومابينهم مشكل ولامن يقاضيه

حمد عبدالله الوايلي - حوطة سدير

هذا المكان اللي له النفس تشتاق

وتحلى به الجلسه وزين الطبيعه

السيل يدرج فالمساء ووقت الاشراق

والناس تفرح ما تحب القطيعه

تفرح بشوف البر زهره وما لاق

في لحظةٍ زادت همومٍ فضيعه

بشائر القحطاني - الرياض